SAMMISAQ 2

Eqqartuussiviit immikkut tamarmik suliaqartarput

Eqqartuussiveqarnermik aaqqissugaanitsinni eqqartuussiviit assigiinngitsorpaaluit atuupput.

Takutitassiami ataaniittumi eqqartuussiviit susassaqarfiillu assigiinngitsut takusinnaavatit.

Eqqartuussiveqarnerup
aaqqissugaanera

Ingerlatitseqqinnissamik Aalajangiisartut
Immikkut Eqqartuussivik maalaaruteqarfiusartoq
Eqqartuussiviit Qullersaat
Nunap eqqartuussivia, Vestre Landsret
Nunap eqqartuussivia, Østre Landsret
Imarsiornermut Niuernermullu
eqqartuussivik
Nalunarsuinermut eqqartuussvik (tinglysningsretten)
Illoqarfiup eqqartuussivia
Kalaallit Nunaanni Eqqartuussiviit
Savalimmiuni Eqqartuussiviit
Eqqartuussisunik atorfinitsitsinermi siunnersuisartut
Eqqartuussisut Saniatigut atorfeqarnermut Ataatsimiititaliamut

Ingerlatitseqqinnissamik Aalajangiisartut

Danmarkimi kikkut tamarmik aallaavittut, suliassaq imminnut tunngasoq, suliarinittarfinni marlunni suliassanngortissinnaavaat. Illoqarfiup eqqartuussiviani inerniliussaq naammaginngikkaanni Nunap Eqqartuussisuuneqarfianut ingerlateqqinneqarsinnaavoq.

 

Taamaasereernermi suliap inerneqarnera suli naammaginngikkaanni, Ingerlatitseqqinnissamik Aalajangiisartunut qinnuteqartoqarsinnaavoq, suliap Eqqartuussiviit Qullersaanni suliarineqarnissaanut. Suliani aalajangersimasuni Ingerlatitseqqinnissamut Aalajangiisartut suliat ingerlateqqinnissaannut akuersissinnaapput. Taamaammallu nammineq aaliangiisoqarsinnaanngilaq suliaq Eqqartuussiviit Qullersaannut suliarineqassasoq.

Immikkut Eqqartuussivik maalaaruteqarfiusartoq

Immikkut Eqqartuussivik maalaaruteqarfiusartoq pinerluttulerinermik suliat suliareqqitassatut qinnutigisimasat suliarisarpaat. Eqqartuussivik maalaaruteqarfiusoq eqqartuussisunik inatsisilerituunilllu soraarsitsinermut pissusissanillu saneqqutsisunut tunngasunik aamma suliaqartarpoq.

Eqqartuussiviup suliarisarpaattaaq illersuisoq mattussaasimappat suliamik pinerluttulerinermut tunngasumiit.

Eqqartuussiviit Qullersaat

Danmarkimi Eqqartuussivik Qullersaq ataasiuvoq. Københavnimi inissisimavoq. Eqqartuussivik Qullersaq Danmarkimi eqqartuussivinni qaffasinnerpaavoq.
Eqqartuussiviup Qullersap suliassaa pingaarnerpaaq tassaavoq eqqartuussissutit Nunap Eqqartuussiviiniittut Illoqarfiullu Eqqartussiviiniittut qanoq eqqartuussisarnissaannut inissiinissaq.
Tassanilu suliat tunngavii aaliangersorneqartarput, sulianut assingusunut qanoq suliassaaneranut tunngavissanngorlugit, imaluunniit suliat inuiaqatigiinni immikkorluinnaq soqutigineqarluinnartut suliarineqartarlutik.

Nunap eqqartuussivia, Vestre Landsret

Danmarkimi nunap eqqartuussivii marluupput: Vestre Landsret aamma Østre Landsret.
Vestre Landsret – Viborg-imiippoq nalinginnaanerusutullu suliarisarpai Jyllandimi illoqarfiit eqqartuussiviini inissisimasut suliarisimasaat.
Danmarkimi illuatungeq tunngaviatigut suliassiissutini eqqartuussivinnut assigiinngitsunut marlunnut nalilertissinnaasarpai. Illoqarfimmi eqqartuussivimmi suliaq naammassereerpat, nalinginnaasumik nunap eqqartuussivianut illuatungeriit arlaannit ingerlateqqinneqarsinnaavoq. Taamaasinermi suliaq ingerlateqqitatut taaneqartarpoq.

Suliani pinerluttulerinermut tunngasuni, pisuussuseq aamma/imaluunniit pineqaatissiineq ingerlateqqinneqarsinnaapput.

Nunap eqqartuussivia, Østre Landsret

Danmarkimi nunap eqqartuussivii marluupput: Vestre Landsret aamma Østre Landsret.
Østre Landsret – Københavnimiippoq nalinginnaanerusutullu suliarisarpai illoqarfiit eqqartuussiviini suliaasimasut, illoqarfiup eqqartuussiviini Lillebælt-ip kangiani inissisimat (Fyn, Sjælland, Øerne/Qeqertat aamma Bornholm) kiisalu Savalimmiuni.

Danmarkimi illuatungeq tunngaviatigut suliassiissutini eqqartuussivinnut assigiinngitsunut marlunnut nalilertissinnaasarpaa. Illoqarfimmi eqqartuussivimmi suliaq naammassereerpat, nalinginnaasumik nunap eqqartuussivianut illuatungeriit arlaanniit ingerlateqqinneqarsinnaavoq. Taamaasinermi suliaq ingerlateqqitatut taaneqartarpoq.

Suliani pinerluttulerinermut tunngasuni, pisuussuseq aamma/imaluunniit pineqaatissiineq ingerlateqqinneqarsinnaapput.

Imarsiornermut Niuernermullu eqqartuussivik

Imarsiornermut Niuernermullu eqqartuussivik eqqartuussiviuvoq immikkuullarissoq marlunnik immikkortortalik, retsafdeling (eqqartuussinermut immikkoortortaqarfik) aamma pigisanik agguaassinermut immikkoortortaqarfik. Pigisanik agguaassinermut immikkoortortaqarfik, akiliisinnaajunnaarnermut sulianut tunngasut Storkøbenhavn-imi eqqartuussivinni inissisimasut suliarisarpai, imaappoq akiliisinnaajunnaarneq (konkurs), akiitsunik isumakkeerinninneq assigisaallu, retsafdeling-imi suliarisarpaat nunat akornanni suliassat imaluunniit suliassat inuussutissarsiutinut tunngasut immikkuullarissut – tassaasinnaallutik tunisassiap ilisarnaataanik (varemærke) piginnittuunissamut tunngasut imaluunniit nioqqutissiamik nutaamik illersuinermut tunngasut.

Nalunaarsuinermut eqqartuussvik (tinglysningsretten)

Nalunaarsuinermut eqqartuussivik Hobro-miippoq, taamaattorli nalunaarsuinermut eqqartuussinerit 2009-mili digital-ikkut ingerlanneqartarput. Nalunaarsuinermut eqqartuussivimmi pigisanut aaliangersimasunut pigisanullu nalilinnut allanut pisinnaatitaaffiit allattorneqartarput. Inimut pigisamut tunngasuusinnaavoq imaluunniit qularnaveeqqummut, assersuutigalugu biilinut imaluunniit tunisassiorfiup nalinganut. Nalunaarsuinerit 75 %-iisa missaat automatiskimik suliarineqartarput, sekundit tallimat iluanni, sinnerili, tassaanerusut suliassat ilungersunarnerusut, Nalunaarsuinermut eqqartuussivimmi inunnik suliarineqartarlutik.

Illoqarfiup eqqartuussivia

Suliat tamarmik illoqarfiup eqqartuussiviani aallartittarput. Suliassat immikkuullarissut Imarsiornermut Niuernermullu eqqartuussivimmi suliarineqarsinnaapput, soorlu suliat nunat akornanni inuussutissarsiutinut tunngasut, angallassinermut suliat ilaat, pisiassat nalunaaqusersornerinut tunngasut, nioqqutissanik nutaanik illersuinermut tunngasut, il.il, tunisaanissamut suliniutinut tunngasut aamma niuernermi isertuussisinnaanermut inatsimmut tunngasut.

Illoqarfiup eqqartuussiviani suliaq ingerlasimappat eqqartuussullu isumaqatiginngikkaanni, Nunap Eqqartuussisuuneqarfianut ingerlateqqinneqarsinnaavoq. Illoqarfimmi eqqartuussiviit aamma suliani ataasiakkaani inuit saqqitsaassutaannik suliat Nunap Eqqartuussisuuneqarfianut innersuussisinnaapput. Illoqarfimmi eqqartuussiviup inuit saqqitsaassutaannik tunngaviatigut suliat aamma suliarisinnaavaat, eqqartuussisulli pingasuussapput, nalinginnaasutulli ataasiinnaanani.

Illoqarfimmi eqqartuussiviup makku suliarisarpai:

  • Pinerluttulerinermut tunngasut
  • Inuit saqqitsaassutaannik suliassat
  • Eqqartuussinernik naammassisitsiniaasartunut tunngasut
  • Pigisanik agguaassinermut tunngasut
  • Naalagaaffiup notaria-nut tunngasut

 

Illoqarfinni eqqartuussiviit byretspræsident-imik aqunneqartarput

Pilerluttulerineq

Pinerluttulerinerit aamma illoqarfimmi eqqartuussivinni suliarineqartarput. Pinerluttulerinermi inuk pinerluttulerisimasutut unnerluunneqartarpoq.

Eqqartuussiviit nalilertussaavaat, pineqartoq pinerlussimanersoq – taamaassimappallu pineqaatissiillutik pinerluttulerinermi inatsimmi immikkoortut naapertorlugit.

Pisiniarfinni tillinnermiit sakkortunerpaamut tunngasinnaallutik soorlu toqutsineq. Pilerluttulerinermut suliani politiit paasiniaareertarput suliarlu misissorlugu nalilersorlugulu, ilumut unioqqutitsisoqarsimanersoq.

Innuttaasoq unnerluussisussaatitaasuniit unnerluunneqassaaq eqqartuussivimmullu orniguttussaalluni, suliaq nalilersortillugu.

Inuit saqitsaassutaannik suliat

Inuit saqitsaassutaannik suliassat illoqarfimmi eqqartuussivimmi suliarineqartarput, aamma innuttaasut isumaqatigiinngissuteqarlersimappata.

Inuit saqqitsaassutaannik suliat illuatungeriinni inuk ataasiusinnaavoq imaluunniit inuit arlallit, aamma suliffeqarfik/inuit aamma oqartussaasut.

Inuit saqitsaassutaannik suliat illuatungeriit aappaata illuatungeq eqqartuutitinniartarpaa, pineqataatisseqqullugu, ass. aningaasanik akiliinissamik, pisinnaatitaaffimmik akuersinissamik, iliuuseqarnissamik imaluunniit unitsitsiniaanermik.

Suliaasinnaavoq pisisup sulisartullu akornanni, akissaq pillugu imaluunnit suliaq pillugu, eqqaamioriit marluk nunaatigisat killii pillugit imaluunniit mobilimik atuisoq mobilinillu atuinermi tuniniaasartup akornanni, akiligassap annertussusia pillugu.

Eqqartuussummik naammassisitsiniaasartoq

Eqqartuussummik naammassisitsiniaasartoq, illoqarfiup eqqartuussiviata ataani inissisimavoq.

Aningaasanik akiitsoqaruit, akiitsutillu akilernagit, aningaasanik pissaqartup eqqartuussummik naammassisitsiniaasartumut suliassanngortissinnaavaa.

Taamaasisoqannginneranili pisariaqarpoq, akiitsut ilumut akiligassaanersut aaliangersoqqassaaq, assersuutigalugu eqqartuussinikkut imaluunniit  qularnaveeqqusiussaqarluni taarsigassarsinermi allagartaqarnikkut.

Eqqartuussummik naammassisitsiniaasartoq piumasaqaammut isumaqataappat, eqqartuussummik naammassisitsiniaasartup aningaasat imaluunniit nalillit akiitsoqartumiit tigunissaannut ikiuutaasinnaavoq.

Pigisanik agguaassisarnermut eqqartuussivik

(illoqarfiup eqqartuussiviani immikkoortoq)

 

Pigisanik agguaassineq pigisanik agguaassisarnermut eqqartuussivimmi suliarineqartarput, taannalu illoqarfimmi eqqartuussiviup ataani immikkoortortatut inissisimavoq.

Pigisanik agguaassisarnermut eqqartuussiviup, toqusup qimataanik aamma toqusup pigisaanik aapparisamut tunniunnissaannut sulianik tunngasunik suliaqartarpoq.

Ilaqutariinnermut eqqartuussivik

(illoqarfiup eqqartuussivata ataani immikkoortoq)

 

Illoqarfimmi eqqartuussiviit tamarmik immikkoortortaqarput ilaqutariinnut tunngasunik suliarinnittarfik.

Tassani angajoqqaat avittarnerinik, angajoqqaatullu akisussaanermik tunngasunik suliaqarnerusarput.

Naalagaaffiup notaria-ta suliassai (uppernarsaatinik atsiuisartoq)

Illoqarfimmi eqqartuussiviit tamarmik notaria-mut tunngasunik suliaqartarput.

Notaria-mut suliassat notar-ip suliarisarpai, suliassaralugillu testamentinik pappilissanillu allanik uppernarsaaneq.

Kalaallit Nunaanni Eqqartuussiviit

Nunatta Eqqartuussiveqarfia sisamanik eqqartuussiveqarpoq taakkulu kommuninut sisamanut agguagaanerat malippaat, Kalaallit Nunaanni Eqqartuussivik aamma Kalaallit Nunaanni Eqqartuussisuuneqarfik.

Nunatta Eqqartuussiveqarfii aamma Kalaallit Nunaanni Eqqartuussivik suliassanik siullermeeriffiupput, imaapput taakkunani suliassat aallartittarput. Siullermeeriffimmi eqqartuussineq naammassereerpat illuatungeriit suliaq ingerlateqqissinnaasarpaat aappassaanik eqqartuussinissamut, tamannalu pisarluni Kalaallit Nunaanni Eqqartuussisuuneqarfimmi.

Savalimmiuni Eqqartuussiviit

Savalimmiuni Eqqartuussivik Danmarkimi Illoqarfiup eqqartuussiviatut suliaqartarpoq. Pineqaatissiissut Savalimmiuni Eqqartuussivimmiit ingerlateqqitassanngortissagaanni, Østre Landsret Savalimmiunukassaaq suliaq suliariartorlugu.

Eqqartuussisunik atorfinitsitsinermi siunnersuisartut

Eqqartuussisunik atorfinitsitsinermi siunnersuisartut suinnersuisartuupput arlaannaannullunnit attaveqanngitsut, eqqartuussisussatut atorfininniarlutik qinnuteqartut suliarisarlugit.

Taakkununnga ilaanngittutuaq tassaavoq Eqqartuussiviit Qullersaanni præsidenti, taanna eqqartuussivinni eqqartuussisunik toqqagaasarpoq.

Siunnersuisartut justitsministeriamut innersuussisarput, eqqartuussisussatullu qinnuteqartoq ataasiinnaq innersuussinnaallugu.

Eqqartuussisut Saniatigut atorfeqarnermut Ataatsimiititaliamut

Eqqartuussisut Saniatigut atorfeqarnermut Ataatsimiititaliamut (Bibeskæftigelsesnævnet) akuersissummik qinnuteqassapput, akissarsiaqaatigalugu saniatigut atorfeqarnissamik kissaateqarunik, assersuutigalugu siunnersuisooqatini imaluunniit ataatsimiititaliani siulittaasutut.

Ataatsimiititaliap nalunaarsussavaa eqqartuussisoq qanoq akissarsiaqarnersoq, eqqartuussisunullu malittarisassanik unioqqutitsisunut kinguneqartitsinissamut periariarfissaqarluni.

Ataatsimiititaliaq ukiut tamaasa paasissutissanik saqqummiussisarpoq, paasissutissat kikkunnik tamanik takuneqarsinnaassammata.